Экскурсия

Кәрим Тинчурин исемендәге Татар дәүләт драма һәм комедия театры Казан халкын һәм башкалабыз кунакларын бай мирасыбызны чагылдырган «Кыз алу» йоласына чакыра. Гореф-гадәтләребезгә нигезләнгән интерактив экскурсия спектакле тамашачыларны тулаем туй алдыннан уздырыла торган «Кыз алу» бәйрәменә алып кереп китәчәк. Биредә аларны җыр-биюләр, такмак әйтешүләр, кызыклы биремнәр һәм кияү коймаклары белән тәмле чәйләр көтә.

Мәктәп укучылары һәм студентлар өчен Пушкин картасы буенча уздырыла. Яшүсмерләр театр музее, тамаша залы, театр цехлары белән таныша ала. Әлеге экскурсия театрның гаҗәеп дәрәҗәдә тәрбияви учак, сихри бер дөнья икәнен аңларга мөмкинлек бирә.

Әлеге концертлар вакытында баш дирижер, М.Җәлил исемендәге Республика премиясе лауреаты И.Камал җитәкчелегендәге Тинчурин театры оркесты тыңлаучыларны оркестр, аның составы белән таныштыра, дөньядагы оркестрларның тарихы һәм эволюциясе турында кыскача мәгълүматлар китерелә, оркестр солистлары оркестрдагы һәр инструментның үзенчәлекләрен күренекле ватан һәм чит ил композиторлары әсәрләре мисалында күрсәтәләр.

Бакча балалары, 1-4 сыйныф укучылары өчен уздырыла. Нәни дусларыбызга театрның тылсымлы матур дөнья икәнлеген төшендерү күздә тотыла. Экскурсия барышында балаларны музей, тамаша залы белән таныштыру көтелә.

Биредә татар театры тарихы татар академия театрының беренче режиссеры, драматург һәм актер Кәрим Тинчуринның мавыгуы аша ачыла. Чәй саклау өчен шәхси капчыклар ясау буенча мастер-класс белән дәвам ителә. Экскурсия театр кафесында татар чәен әзерләү буенча мастер-класс һәм чәй эчү белән тәмамлана.

Туристлар, шәһәребез кунаклары, тамашачылар өчен уздырыла. Тамашачы театрның бай тарихы, шулай ук Республиканың мәдәни мирас объекты булган бина тарихы турында мәгълүмат ала. Театр буенча экскурсия барышында музей, тамаша залы, сәхнә арты серләре белән таныша.

Экскурсиягә килгән тамашачы бөек драматург, талантлы артист, күренекле режиссер, татар театрына нигез салучыларның берсе Кәрим Гали улы Тинчуринның тормыш юлы һәм иҗаты, нәсел шәҗәрәсе, гаиләсенең шәхси әйберләре белән таныша ала.

Экскурсия барышында катнашучылар театрның бай тарихы һәм бөек драматург, талантлы артист, күренекле режиссер, татар театрына нигез салучыларның берсе Кәрим Гали улы Тинчуринның тормыш юлы, иҗаты белән дә таныша алачаклар.

Күргәзмә театрның 90 еллык юбилее уңаеннан оештырылды. Тамашачы театрның төрле локацияләрендә урын алган афишалар аша театрның данлы үткәне, шулай ук Республиканың мәдәни мирас объекты булган бина тарихы белән таныша ала.