Кәрим Тинчурин исемендәге татар дәүләт драма һәм комедия театры артистлары Кайбыч авылы мәдәният йорты сәхнәсендә чыгыш ясады. Алар, мәктәп укучыларының язгы каникулын мәдәни яктан тагын да баетып, Илһам Галинең “Гомер буе сине көтәм” әсәрен күрсәттеләр.
Спектакльне мәктәп укучылары да, авыл яшьләре дә бик яратып карады. “Гомер буе сине көтәм”не карарга Кайбыч районы башкарма комитетының гомум бүлеге җитәкчесе Дания Бәдертдинова һәм мәгариф бүлеге башлыгы Илмас Хәмидуллин да килде.
Чын тормышны тасфирлаган «Гомер буе сине көтәм» спектакле – гомер буена сузылган сокландыргыч бер мәхәббәт тарихы. Язмыш Әдиләне шактый сыный: бик яшьли әти-әнисен югалта, ире ташлап китә, эшеннән дә кыскарталар. Бердәнбер кызы да кияүгә чыгып читкә киткәч, ул бөтенләй берьялгызы кала. Инде нишләргә? Тормышны ничек дәвам итәргә? Ләкин төшенкелеккә бирелергә иртәрәк әле. Чөнки аның теләсә нинди авыр чакта да ярдәмгә ашыгучы, үзен шашып яратучы балачак дусты – Гаделе бар бит! Гади китапханәче белән гади урманчы арасындагы саф, сагышлы мәхәббәт тарихы безне уйланырга да, елмаерга да мәҗбүр итә.
