6 ноябрь кичендә Тинчурин театрында “Кияү урлау” спектакле алдыннан артистлар тамашачылар белән бергәләп театрның туган көнен бәйрәм итте. Күркәм гадәт буенча, фойеда халыкны Ильяс Камал җитәкчелегендәге камера оркестры чыгышы, күңелле җырлар, биюләр белән каршы алды. Тинчурин театрының күренекле артистлары Ләлә Миңнуллина, Әлфия Хәсәнова, Нуретдин Нәҗмиев, Люция Галләмова, Миләүшә Нәҗмиева, Зөләйха Хәкимҗанова, Гүзәл Гарәпшиналар һәркемне колач җәеп каршы алды, аралашты, җилкендереп биетте.
Бәйрәм кичәсен Татарстанның атказанган артисты Алмаз Фәтхуллин алып барды, Татарстанның халык артистлары Резедә Төхфәтуллина, Рамил Минхановлар иң матур җырларын бүләк иттеләр. Шулай ук Татарстанның атказанган артисты Ренат Шәмсетдинов, Айсылу Мөсәлләмова, Илнур Байназаровлар тамашачыларны чыгышлары белән сөендерде. Гардеробта өс киемнәрен тапшырып, 89 санлы элгечкә туры килгән бәхетле тамашачы “Ак тәүбә, кара тәүбә. Безнең көннәр” спектакленә чакыру билетларына ия булды. Концертны Татарстанның атказанган артисты Илсур Мортаза оештырды. Сценарий авторы -Татарстанның атказанган артисты Шамил Фәрхетдинов.
5 ноябрьдә Тинчурин театрының 89 еллыгын аның музеенда да билгеләп үттеләр. Чараны Татарстан Республикасының атказанган мәдәният хезмәткәре Розалия Чабатова оештырды һәм алып барды.
Тинчурин театры матбугат үзәге
