Июнь ае башында Тинчурин театры коллективы Казандагы зиратларга барып, бакыйлыкка күчкән хезмәттәшләрен искә алды.
Яңа Татар бистәсе зиратында Тинчурин театрында озак еллар режиссер булып эшләгән, танылган династия вәкилләре Кәшифә Тумашева, Равил Тумашева, Диләрә Тумашеваларның җәсәде күмелгән. Шулай ук ирле-хатынлы Люция һәм Фердинанд Фарсиннар, Сания Исмәгыйлева, Бибинур Галиуллина, Оркыя Кушловская, Зәйнәп Камалова, Мәрьям Рәхмәтуллиналар шушы зиратта җирләнгән. Артистлар аларны бик хөрмәтләп искә алдылар.
13 июньдә күркәм дата көтелә – Кәрим Тинчуринның хәләл җефете Заһидә Тинчуринаның тууына 125 ел тула. Аның каберенә дә чәчәкләр салынды, рухына багышлап догалар укылды. Бөек Тукай, легендар Сара Садыйкова, Рәфкать Бикчәнтәев, Мөхәммәт Сафин, Туфан Миңнуллин, Дамир Сираҗиев, Хәния Фәрхи һәм башка сәнгать әһелләренең каберләре дә биредә. Тинчуриннар аларны зурлап искә алып, истәлекләр белән уртаклаштылар.
Тинчурин театры коллективының икенче төркеме шәһәр читендәге берничә зиратка барып килде. Әлфия Хәсәнова сүзләренчә, артистлар Һаҗәр Шәкүрова, Наил Шәйхетдинов, Тәслимә Фәйзуллина, Исламия һәм Хәлил Мәхмүтовлар, Асия һәм Әнәс Галиуллиннар, Әминә Мөхәммәтгалиева, Минҗиһан Кәлимуллина, Мөхәммәт Хәмзин һәм башкаларның каберләрен йөреп чыкты.
«Һәрберсен барлап, каберләрен тәртипләп, исәнләшеп, зиярат итеп кайттык. Аларны олылавыбыз да, сагынуыбыз да, тормыш турында уйлануларыбыз да бу… Аларга теләкләр теләкләр теләп кайту, истәлекләрне яңарту күңелгә әйтеп бетергесез җиңеллек китерә.
Сафьян абый Ибраһимовның каберен ничә еллар таба алмадык, яртышар көн эзләгән чакларыбыз булды. Бүген исә күңелемнән «табыл, табыл, дога укыйсыбыз бар», дип кабатлап бардым. Ни хикмәт, күземсә күренәме дип торам – туп-туры аның кабере каршына килеп чыктык. Ничек аңлатасың бу искиткеч хәлне, Ходайның рәхмәте, һичшиксез!» – дип сөйләде Татарстан Республикасының атказанган артисткасы Әлфия Хәсәнова.
Тинчуриннарның бер төркеме Самосырово, Киндери, Коры Елгадагы зираттагы каберләр янында, икенче төркем Яңа Татар бистәсе зиратында булды.
«Мәгълүм ки, тарихын белгәннең генә киләчәге бар. Бирегә килеп әрвахларны искә алу безнең өчен фарыз гамәл. Елга ике тапкыр – язын һәм көзен йөрибез. Бүген бер Мәшһүр шәхесләребезнең рухына дога кылу күңелгә рәхәтлек бирә. Аллаһы Тәгалә ризалыгы өчен булсын», – дип сөйләде Татарстан Республикасының халык артисты Зөфәр Харисов.
Кешенең кальбен күркәмләндерә торган шундый саваплы эш-гамәлләр алга таба да дәвамлы булачак, әлбәттә. Бакыйлыкка күчкәннәрнең рухы тыныч, каберләре нурлы булсын.
Тинчурин театры матбугат үзәге
