21 апрельдә Кәрим Тинчурин театры каршындагы сәламәтлеге чикләнгән балаларның “Могҗиза” студиясе “Миһербанлык” спектакле премьерасын күрсәтте.
Спектакльдә дүрт бала – Анель, Алсу, Айрат һәм Әмир интернет челтәрендә “Ялкынлы шәһәр” уенында танышып, якын дусларга әйләнәләр. Әмма, ни кызганыч, тормышта берсенең генә дә чын дусты юк. Төрле язмышлы, тормыш авырлыкларыннан интернет дөньясына чумган балаларны, кинәт кенә ут бетү яшәешкә чыгара. Алар үзләренең чынбарлыгы белән күзгә-күз очраша. Әмма “Ялкынлы шәһәр” уеныннан килгән “бүләкләр” аларга тормышка башка яктан карарга ярдәм итә. Урамга алып чыга. Тере дуслар белән таныштыра.
Фантастик әкиятнең авторы – Тинчурин театры артисты Илфак Хафизов, режиссеры – Россиянең атказанган, Татарстанның халык артисты Зөфәр Харисов.
Спектакль «Во благо вместе» инициатив төркеме җитәкчесе Альбина Фәрид кызы Сәлимгәрәева ярдәмендә әзерләнде. Спектакльнең иганәчесе “Могҗиза” студиясенең алга таба да яңа спектакльләр әзерләячәген, төрле фестивальләрдә катнашачагын белдерде.
Спектакльне карарга килүче тамашачылар арасында яшь актерларның әти-әниләре, әби-бабайлары гына түгел, сәламәтлеге чикле балаларга теләктәшлек белдерергә килгән гади тамашачылар да күп иде. Тинчурин театры актрисасы, Татарстанның халык артисты Зөләйха Хакимҗанова спектакльне югары бәяләп, Зөфәр Харисовка ихлас рәхмәтен әйтте.
“Театр директоры Фәнис Мөсәгыйтов инициативасы белән оешкан “Могҗиза” студиясе Тинчурин театрын тагын да нурландырып җибәрде. Әлеге студия күпме балага хыялларын тормышка ашырырга ярдәм итеп, Татарстан мәдәниятенә үз өлешен кертә” -, дип сөйләде Зөләйха Хәкимҗанова.
Тинчурин театры баш режиссеры Туфан Имаметдинов театрның яңа алымнарга мөрәҗәгать итүен, үзенчәлекле проектлар эшләвен искә алып, “Могҗиза” студиясенең заманча татар мәдәниятенең бер өлеше булуын әйтеп узды.
“Сәхнәдә гадәти һәм сәламәтлекләре чикле кешеләрнең спектакль куя алуы – үзе зур могҗиза. Кешеләрне төркемнәргә аермау, һәркемгә үсештә булырга мөмкинлек бирү – җәмгыятьнең зур казанышы” -, дип чыгыш ясады Туфан Имаметдинов һәм Зөфәр Харисовка, Гөлназ Нәүмәтовага, Салават Хәбибуллинга, Фәрһад Мөхәммәтҗановка, проектның кураторы, Тинчурин театрының баш администраторы Зөлфия Бәшәровага рәхмәтен белдерде.
Казан мәдәният һәм сәнгать институты доценты Раушан Шәриф исә “Могҗиза” студиясе аркылы Тинчурин театрының изгелек, миһербанлык төшенчәләрен популярлаштыруын әйтеп китте.
Казан яшь тамашачылар театрының «Создавая театр» инклюзив студиясе оештыручысы Дарья Хуртина “Могҗиза” студиясенең “Миһербанлык” спектаклен югары бәяләде һәм аны бөтен халыкка күрсәтергә кирәклеген яшермәде. Ул спектакльдә әти-әниләрнең катнашуын да аерым әйтеп узды.
Сәламәтлеге чикләнгән балалар өчен “Могҗиза” театр студиясе К.Тинчурин исемендәге Татар дәүләт драма һәм комедия театры директоры, Татарстанның атказанган мәдәният хезмәткәре Фәнис Наил улы Мөсәгыйтов инициативасы буенча 2019 нчы елның язында оеша. Биредә Даун синдромы, ДЦП диагнозлы балалар сәхнә серләрен үзләштерәләр. “Могҗиза” театр студиясенең укытучылары – Россиянең атказанган, Татарстанның халык артисты Зөфәр Харисов, Татарстанның атказанган артисткасы Гөлназ Нәүмәтова һәм театрыбызның яшь талантлы артисты Салават Хәбибуллин. Кураторы – театрның баш администраторы Зөлфия ханым Бәшәрова.
Театр студиясе оешканда бирегә барлыгы 7 бала йөрергә теләк белдергән булса, хәзер исә бу сан 15 кә җитте. “Могҗиза” ның тагын бер үзенчәлекле ягы шунда: укытучылар балаларда татар теленә мәхәббәт тәрбияли.
Тинчурин театры матбугат үзәге
