Бүген Тинчурин паркында танылган драматург, актер, режиссер Кәрим Тинчуринның тууына 135 еллык уңаеннан әдәби-музыкаль флешмоб уздырылды.
Җыелган халык каршында Тинчурин театрының камера оркестры, артистлар Гөлчәчәк Хафизова, Резеда Төхфәтуллиналар чыгыш ясады. Айсылу Мөсәлләмова белән Булат Зиннәтуллин данлыклы «Сүнгән йолдызлар» спектакленнән өзек күрсәтте. Тамашачылар арасында балалар да күп иде, алар артистларга кушылып җырлады, алкышлады, уеннарда активлык күрсәтте. Бию бәйгеләре бәйрәм рухын арттырды, оештыручылар катнашучыларны күчтәнәчләр белән куандырдылар. Флешмобның максаты – классикның исемен, данын халык арасында яңарту, иҗатын тарату, юбилее хакында белгертү. Чыннан да, әлеге чарада булганнар Кәрим Тинчурин турында күбрәк мәгълүматка ия булып, иҗаты белән илһамланып, аның исемендәге театрда яңа сезонда буласы чаралар хакында ишетте.
Тинчурин театры матбугат үзәге
