Татарча Русский English

“Ефәк баулы былбыл кош” – 34 елдан соң («Татар-информ» МА)

Кичә, 25 ноябрьдә, Кәрим Тинчурин исемендәге Татар дәүләт драма һәм комедия театрында Аяз Гыйләҗев әсәре буенча «Ефәк баулы былбыл кош» спектакленең премьерасы булды. Спектакльнең яңа куелышы күренекле татар язучысы, драматург Аяз Гыйләҗевның тууына 90 ел тулуга багышланган.

Әлеге спектакльне моннан 34 ел элек — Күчмә театр чорында режиссер Равил Тумашев куйган иде. Мияссәр карт ролендә – Нуриәхмәт Сафин, Рәшидә әби ролендә Нурия Вәлиева уйнаган. Хәзер Рәшит Заһидуллинның яңа куелышында Рәшидә ролендә Россиянең атказанган, Татарстанның халык артисткасы Исламия Мәхмүтова. Мияссәр карт — Татарстанның атказанган мәдәният хезмәткәре Сәлим Мифтахов. Ул чакта Шифанны уйнаган Люция Галләмова хәзер спектакльнең бердәнбер тискәре образы булган Хүрияне башкара.

Спектакльне караган Россиянең атказанган, Россиянең халык артисты Нуриәхмәт Сафин: “Мин бу спектакльгә үземнең яшьлегемә кайтыр өчен килдем. Чөнки Күчмә театрда эшләгән чакларымны һаман да сагынам. Иптәшләремә рәхмәтлемен, димәк, Күчмә театр заманнарында ук халыкның күңеленә кереп калырлык, тамашачы яратырлык әсәрләр куелган икән. Тинчурин театрының сиксәненче еллардагы әсәрне яңадан халыкка күрсәтүе, зур проблемалар кузгатылган әсәрне яңгыратулары бик хуп. Мин моңа бик сөендем, үземнең уйнаган чакларымны искә төшердем.. Ул еллар минем өчен бәхетле чорым дисәм… бәхетле чорлар тагын булгандыр инде, әмма халык алдына Мияссәр кебек зур образ белән чыгуларымнан соң мине халык таныды. “Рәшидәәәәүүүү” дип йомшак кына эндәшүләремне урамда очраткан кешеләр дә сагынып искә төшерләр иде”, -диде.

Кичә, 25 ноябрьдә, «Ефәк баулы былбыл кош» спектаклен карарга Татарстан Республикасы Президенты Аппараты җитәкчесе Әсгать Сафаров, Татарстан Республикасы мәдәният министры Айрат Сибагатуллин, шулай ук Аяз Гыйләҗевның тормыш иптәше Нәкыя ханым һәм уллары Мансур белән Искәндәр Гыйләҗевлар, Венгриядән кунаклар килгән иде, дип хәбәр итте  театрның матбугат хезмәте. Спектакль тәмамлангач, Нәкыя ханым Гыйләҗева белән галимә-филолог, тәнкыйтьче Миләүшә Хәбетдинова сәхнәгә чыгып спектакль куючыларга рәхмәтләрен җиткерделәр. Миләүшә ханым Аяз Гыйләҗевның “Йәгез, бер дога” әсәре венгр теленә тәрҗемә ителә башлавы турында хәбәр итте.

“Бу спектакльнең сәхнәдә куелуы безнең өчен бик зур вакыйга. Бу әтигә тагын бер һәйкәл, аны искә алу. Аның иҗаты турында тагын бер уйлану. Шуңа күрә премьерага бик дулкынланып, шатланып килдек”, диде Татар энциклопедиясе институты мөдире, тарих фәннәре докторы, профессор Искәндәр Гыйләҗев.

“Без әтиебезнең классик булына ныклап ышанабыз. Әтинең әсәрләре Тинчурин театрында гына түгел, күп театрларда куела. Димәк, халык ул әсәрләрне көтә, ул әсәрләрне ярата. Аның сәбәбе, беренчедән, әсәрләре бик милли, алар ихластан язылган, алардагы тел байлыгы шулкадәр зур хәзинә. Ул спектакльләрне бер музей кебек кабул итергә була, бер мәктәп тә ул. Кешеләр ничек яшәгәннәр, нинди мөнәсәбәтләр булган — Аяз Гыйләҗев әсәрләре белән чорны өйрәнергә була. Бу премьера безнең гаилә өчен зур шатлык”, — диде драматург Мансур Гыйләҗев.

Спектакльнең премьерасы бүген, 26 ноябрьдә, һәм 3 декабрьдә булачак.

Рузилә Мөхәммәтова, «Татар-информ» МА