Син бит минем бергенәм

РСФСРның атказанган, Татарстанның халык артисткасы Исламия Мәхмүтованың “Син бит минем бергенәм” әсәре тормыштан алып язылган.
Саф, якты, иң тәүге мәхәббәт Айнурны үлем кочагыннан коткара. Аны сөйгән Алинәнең дә хисе сүрелми, Айнур исеме аның күңел түрендә. Ләкин язмыш аларны шактый сыный. Алинә белән Айнур югалтуларга тап булып, соңлап кына очрашалар. Тик үткәндә калган ярату өчен күпме көч һәм сабырлык белән ирешелгән бүгенгене җимерергәме?! Ике күзе дә дөм сукыр Айнур Алинәгә “тормыш упкынына” бергә сикерергә кулын сузармы?!
Бер-берсен өзелеп сөйгән ярларның язмышларына фаҗига булып кергән сугыш йөрәкне тетрәндерә. Чөнки ул – безнең ил фаҗигасы: бабалары үлә Германда, аталары – Бөек Ватан сугышында, абыйлары – Әфганстанда, газиз уллары, сөйгән ярлары һәлак була Чечняда…

Спектакльнең премьерасы 2018 нче елның 21 нче декабрендә булды.