Новосибирск шәһәрендә XIV Себер татар яшьләре фестивале узды. Аны Новосибирск өлкәсенең Мәдәният министрлыгы оештырды.
Фестивальне Новосибирск өлкәсе татар мәдәнияте үзәге, Новосибирск өлкәсенең төбәк татар милли-мәдәни автономиясе, Бөтендөнья татар конгрессы, Татарстан Республикасы Мәдәният министрлыгы, Россия татарларының Федераль милли-мәдәни автономиясе, «Себер татарлары ассоциациясе», «Идел» яшьләр үзәге гамәлгә ашыра.
Өч көнлек чара программасына вокал, бию, актерлык осталыгы буенча мастер-класслар, татар теле дәресләре, нәфис сүз сәнгате, татар тарихыннан лекцияләр, проектлар эшләү буенча гамәли семинарлар, «Төнге урам» уены, «Кайнар баш» татар интеллектуаль уены һ.б. кертелгән иде.
Фестиваль Новосибирск шәһәрендәге Татар мәдәнияте йорты территориясендә концерт белән тәмамланды.
Фестивальдә Новосибирск өлкәсе районнары, Россия һәм Якын чит илләрдә яшәүче татар яшьләре катанашты. Алар арасында иҗат коллективлары, солистлар, КВН командалары, журналистлар, галимнәр, спортчылар, шулай ук татар иҗтимагый оешмалары активистлары бар иде. Чарага 16 яшьтән 35 яшькә кадәр яшьләр җыелды.
Тинчурин театры матбугат үзәге
