31 нче мартта К.Тинчурин театрында режиссерлар, актерлар, үзешчән театр коллективларының җитәкчеләре өчен “Идел йорт” фестиваленең лабораториясе үткәрелде. Укуда Татарстанның Саба, Питрәч, Мамадыш, Мөслим районнарыннан 60тан артык кеше катнашты.
Әлеге лаборатария кысаларында “Репертуар сайлау серләре”, “Актерлык үрнәкләрен тудыру. Актер осталыгы”, “Сәхнә теле” һәм “Сәхнә киеме тудыру” темасына төрле мастер-класслар оештырылды.
Тинчурин театры актрисасы Резеда Сәләхова сүзләренчә, мастер-класслар халык театры артистларына, режиссерларына, җитәкчеләренә сәхнә осталыгы һәм режиссура ягыннан шактый файдалы узды. Мастер-классларны К.Тинчурин театры актерлары Ирек Хафизов, Зөлфәт Закиров һәм Резедә Сәләхова үткәрде. Халык театрларында катнашучылар К.Тинчурин театрының режиссеры Илнур Гарифуллинның репетициясен карап, соңыннан фикер алышу булды. Халык театры артистлары фикеренчә, алар өчен режиссерның артист белән эшләү алымнарын күрү практик яктан бик файдалы булган. Шулай ук рәссам-модельер Наҗия Галимова белән очрашу узды. Чара К.Тинчурин театрының “Сүнгән йолдызлар” спектаклен карау белән тәмамланды.
К.Тинчурин театрының матбугат бүлеге.
