7 июнь көнне, Лаеш районының Атабай авылында Тинчуринлылар ТАССРның халык артисты, театрыбызның горурлыгы, күпкырлы талантлы шәхес Гата Исай улы Нуруллинның тууына 100 елы тулу уңаеннан оештырылган чарада катнашты.
Әлеге чарага Г. Нуруллинның туганнары, авылдашлары да җыелды.
Иң элек искә алу чарасында катнашучылар Г. Нуруллин каберен зиярәт кылды, Наил хәзрәт догалар укыды.
Зираттан соң, искә алу чарасы мәдәният йортында дәвам итте. Анда исә кунакларны, мәдәният йорты мөдире Гөлфия ханым каршы алды.
Чара барышында хөрмәтле артистларыбыз Г. Нуруллин белэн эшләгән елларны сагынып, зур хөрмәт белән искә алдылар. Туганнары Г. Нуруллинны кешелекле, туган җанлы булуы, ә авылдашлары исә аның белән горурланулары турында әйтте.
Мәдәният йортындагы истәлекле очрашу театрыбызның гимнына әйләнгән “Картаямени соң йөрәк?”(Г. Нуруллин сүз.) җыры белән тәмамланды.
Аннан соң авыл советы рәисе Люзия ханым авылның истәлекле урыннары белән таныштырды.
Музейда да булдылар, истәлеккә фотога төштеләр.
Бу матур чараны театрыбызның музей мөдире Розалия Чабатова оештырды.
Истәлекле чарада актив катнашулары өчен без зур рәхмәтләребезне туганнарына, авылдашларына җиткерәбез.
Әлеге вакыйга һичшиксез, онытылмаслык булып, тарих битләрендә үз урынын алыр.
Гата Исай улы Нуруллинның тууына 100 елы тулу уңаеннан оештырылган чарадан истәлекле фотолар
