11 октябрьдә «Казан» гаилә үзәгендә Тинчурин театры юбилей сезонының беренче премьерасы – «Ай, былбылым!» спектакленә багышланган пресс-конференция уздырды.
Чарада Кәрим Тинчурин исемендәге Татар дәүләт драма һәм комедия театры директоры Фәнис Мөсәгыйтов, К.Тинчурин исемендәге Татар дәүләт драма һәм комедия театрының баш режиссеры Туфан Имаметдинов, Россиянең атказанган, Татарстанның халык артисты Зөфәр Харисов, Татарстанның халык артисты Ләлә Миңнуллина, Татарстанның атказанган артисты Гүзәл Гарәпшина, Татарстан Республикасы Министрлар Кабинетының Гражданлык хәле актларын теркәү идарәсе башлыгы Гөлшат Нигъмәтуллина катнашты.
Кунакларны Тинчурин театры оркестры музыкаль композицияләр белән каршы алды. Пресс-конференциягә мәртәбәле кунаклар буларак Мидхәт Сафа улы һәм Венера Гали кызы Нурсубиннар чакырылган иде. Быел алар бриллиант туйларын билгеләп үтә. Аларны Фәнис Мөсәгыйтов һәм Гөлшат Нигъмәтуллина гаилә коруларына 60 ел тулу белән котлап, спектакльләргә сертификат һәм истәлекле китап тапшырды.
Мидхәт агага 12 яшьләр тирәсендә Пермь өлкәсенең Барда районындагы аларның авылына Тинчурин театры килеп, өйләрендә туктала торган булган. Бервакыт театр «Аршин мал алан» спектаклен алып килгән, авыл халкы аны шулай яратып кабул иткән, хәтта ул спектакльдән булган җырны да халык озак теленнән төшермәгән. Нурсубиннар кызларына да «Аршин мал алан» спектакле героинясы исемен кушкан.
Чара тәмамланганнан соң журналистларга «Казан» гаилә үзәге буйлап экскурсия оештырылды.
