К.Тинчурин артистлары Казан шәһәре 6-нчы гимназиясендә уңышлы эшләп килгән “Манзара” театр студиясенең 6 еллыгына багышланган бәйрәм чараларында катнашты. Истәлекле дата уңаеннан, “Манзара” студиясендә катнашучы укучылар Туфан Миңнуллинның “Азат” әсәрен күрсәтте. Мәктәп укучылары, әти-әниләр һәм килгән кунаклар “Манзара” студиясе спектаклен югары бәяләде.
Бәйрәмдә Тинчурин театры артистлары – Зөфәр Харисов, Илгизәр Хәсәнов, Миләүшә Нәҗмиева, Зөлфия Вәлиева, Ирек Хафизов, Гөлчәчәк Хафизова, Рөстәм Гайзуллин, Гөлназ Нәүмәтова һәм Салават Хәбибуллин чакырулы иде.
Татарстанның атказанган артисты Ирек Хафизов сүзләренчә, “Манзара” студиясенең, гомумән 6-нчы гимназиянең, Тинчурин театры белән элемтәдә торуы, хезмәттәшлек итүе бик уңай күренеш. Театр алга таба да “Манзара”лар белән хезмәттәшлек итәчәк.
Тинчурин театры матбугат үзәге
