Танылган татар дизайнеры үзенең остаханәсендә театрга килүчеләргә татар костюмы тарихы, аның хәзерге торышы турында сөйли.
Рәссам үзенең остаханәсендә балаларны кечкенәдән театр сәнгатенә җәлеп итүгә, театр образын диалог өчен ачык киңлек буларак формалаштыруга ярдәм итүче мастер-класслар үткәрә. Һәр ай дәвамында биредә театр спектакльләрендәге геройларның образларын тудыру буенча мастер-класслар, шулай ук чигү, аппликация, тегү, зәркән сәнгате, әвәләп ясау, рәсем ясау һәм коллаж техникасы буенча татар гамәли сәнгате үрнәкләре уза. Болар: “Асылкош” спектакленә багышланган кош-кадавыч (заколка), алкалар, брошь, беләзек, этник стильдә күкрәк бизәге, чулпылар һ.б. Шулай ук өлкән аудитория өчен татар образларын булдыру буенча фешн-эскизлар үткәрү планлаштырыла. Мастер-класслар театрның премьера һәм репертуар спектакльләренә багышланачак.
Наҗия Галимова — рәссам-дизайнер, модельер, ике тапкыр Islamic Clothes Халыкара конкурсы Гран-при иясе, «хәзерге костюмдагы этник мотивлар» номинациясендә югары мода «Этно-Эрато» халыкара конкурсы җиңүчесе, КФУның әдәби-нәфис салонының мактаулы әгъзасы. Ул «Европа-Азия» Халыкара гуманитар академиясенең, ЮНЕСКО мәдәният һәм сәнгать институтының Рәхмәт хаты белән бүләкләнгән. Наҗия Галимова Казан дәүләт технология университетын, тегүче-закройщик белгечлеге буенча һөнәри училище тәмамлый.
Мастер-класска билетларны Пушкин картасы белән дә сатып алып була.
Элемтә өчен +7 965 597-78-55
Тинчурин театры матбугат үзәге
