Кәрим Тинчурин театры “Сәйдәш. Йокысызлык” спектакле премьерасына багышланган матбугат конференциясенә чакыра! Хөрмәтле журналистлар! Сезне 14 декабрь, 11:00 сәгатьтә, “ТАТМЕДИА”ның (Декабристлар ур., 2) конференц-залында узачак матбугат конференциясенә чакырабыз!
Спикерлар:
1. Фәнис Мөсәгыйтов – К.Тинчурин исемендәге Татар дәүләт драма һәм комедия театры директоры, Татарстанның атказанган мәдәният хезмәткәре;
2. Резеда Гарипова – пьеса авторы, режиссер;
3.Рөстәм Гайзуллин – Татарстанның атказанган артисты;
4. Луиза Янсуар – пьеса авторы.
16, 17 һәм 18 нче декабрь (көнгә 3 тапкыр: 13:00, 16:00, 18:30 сәгатьләрдә) Луиза Янсуар һәм Резеда Гарипова әсәре буенча куелган “Сәйдәш. Йокысызлык” спектакленең премьерасы була.
Спектакльнең жанры – лабиринт. Режиссёры – Резеда Гарипова; рәссамы – Илшат Вилданов; композитор — Александра Мостафина, Марат Шәяхмәтов, Ания Фәйзрахманова (JUNA төркеме); хореограф – Резедә Муллагалиева; хормейстер – Алия Хәмзина; ут кую буенча рәссам – Илшат Сәяхов; дирижер – Ильяс Камал; инструменталь ансамбль җитәкчесе — Евгения Малетина; режиссер-куратор — Зөлфәт Закиров.
Спектакльдә Татарстанның халык артисткасы – Ләлә Миңнуллина; Татарстанның атказанган артистлары – Әлфия Хәсәнова, Рөстәм Гайзуллин; М.Җәлил исемендәге Республика премиясе лауреатлары – Резедә Сәләхова, Артем Пискунов; яшь артистлар – Илфак Хафизов, Зөлфәт Закиров, Илнур Байназаров, Айсылу Мөсәлләмова, Салават Хәбибуллин, Лилия Камалиева, Айдар Фәтхрахманов, Альбина Гашигуллина; чакырылган артист Зәринә Вилданова һәм КТУ студентлары катнаша.
Спектакль турында:
Кем ул безнең өчен Сәйдәшев? Легенда? Символ? Онытылып барган дәвер? Арабызда булган һәм китеп барган кемдер?
Музыкасы мәңгелекме, әллә безгә инде бөтенләй кирәк түгелме?
Без үзебез кемнәр? Хакыйкатьләр һәм кыйммәтләр алышынып торган дөньяның вак бер өлешләреме? Нигә гармония югалды җаннарыбыздан?
«Сәйдәш. Йокысызлык» – беренче чиратта, әнә шул сорауга җавап эзләү. Бөек композитор биографиясе һәм иҗатындагы нинди лабиринтлар буйлап йөргәнебез юк? Ул лабиринтлар аша узганнан соң, инде элеккеге була алырбызмы?
Спектакль тойгылар дөньясына чакыра: кеше, дәвер, галәм кайсы ноктада кисешә? Аларның мәңгелек биюе безнең йөрәк аша узып, нәрсә җимерә һәм нәрсә тудыра ала?
Без бу лабиринтка керергә әзерме?