К.Тинчурин исемендәге Татар дәүләт драма һәм комедия театры театраль сабантуйның җиңүчесе булды. Нәтиҗәдә театрга Татарстан Республикасы Президентыннан Лада Веста җиңел автомобиле тапшырылды. Быел машина беренче тапкыр театрга бирелде. Нәтиҗәләр унөч ярыш буенча баллар ярдәмендә ясалды. Шулай итеп, беренче урынны Тинчурин театры яулады, икенче урынны Кариев белән Минзәлә театрлары бүлеште, өченче урынны Камал театры алды. Тинчурин театры актерлары милли көрәштә төрле авырлык үлчәмнәрендә, капчык киеп йөгерү, бию марафоны, гер күтәрү һ.б. уеннарда җиңде.
Быел беренче тапкыр театр сабан туе кысаларында театрлар арасында волейбол ярышлары узды. Тинчурин театры командасы исә өченче урынга лаек булды. Быел театраль сабантуйның баш батыры булып Кариев театры артисты Муса Камалов калды. Казан консерваториясен тәмамлаган 27 яшьлек Камалов татар тамашачысына эстрада һәм опера җырчысы буларак билгеле. Яшь актер Кариев театрында 2020 елдан эшли. Сабантуй батырына төп бүләк сыйфатында тәкә бирделәр.
Ундүртенче тапкыр үткәрелүче театр сабан туе быел Минзәләдә булды. Бәйрәмдә республика театрлары коллективлары, шулай ук Татарстанның танылган мәдәният һәм сәнгать әһелләре катнашты.
Театраль сабантуй Татарстан Республикасы Мәдәният министрлыгы, Кәрим Тинчурин исемендәге Татар дәүләт драма һәм комедия театры, Минзәлә районы хакимияте, С.Өметбаев исемендәге Минзәлә татар дәүләт драма театры тарафыннан Татарстан Хөкүмәте ярдәме белән оештырылды.
Бәйрәм театр сабан туе дип аталса да, ул гер күтәрү, капчык киеп йөгерү, чүлмәк вату, капчык сугышу, милли көрәш, аркан белән тартышу кебек традицион ярышлардан башка узмый. Быел Сабантуй кысаларында беренче тапкыр театр коллективлары волейбол буенча көч сынашты. Ярышта беренче урынны — Чаллы театры, икенче урынны — Камал театры, өченче урынны исә —Тинчурин театры алды.
Беренче тапкыр театр сабан туе 2005 елда Тинчурин театры директоры Фәнис Мөсәгыйтов инициативасы белән узды. Шуннан бирле бу бәйрәмдә ел саен Татарстанның иҗат коллективларыннан 3 меңләп кеше катнашып килә. Сабан туенда ел саен Татарстанның театр коллективларыннан өч меңнән артык вәкил катнаша. Бәйрәмнең төп максаты — милли татар мәдәниятен саклап калу һәм пропагандалау.
