17 майда театрыбыз каршында эшли торган, сәламәтлеге чикләнгән балалар өчен «Могҗиза» театр студиясе «Алтын алма» дигән маҗаралы әкият тәкъдим итте.
Автор – Шамил Фәрхетдинов, куелыш җитәкчесе – Зөфәр Харисов, режиссер – Салават Хәбибуллин.
«Могҗиза» театр студиясенең укытучылары – Россиянең атказанган, Татарстанның халык артисты Зөфәр Харисов, Татарстанның атказанган артисткасы Гөлназ Нәүмәтова һәм театрыбызның талантлы артисты Салават Хәбибуллин. Кураторы – Татарстанның атказанган мәдәният хезмәткәре Зөлфия Бәшәрова.
«Могҗиза» студиясе театрыбыз директоры Фәнис Мөсәгыйтов инициативасы буенча 2019 елның язында оешты. Әлеге изге эш Альбина Сәлимгәрәева җитәкчелегендәге «Во благо вместе» хәйрия фонды инициатив төркем ярдәме белән берлектә тормышка ашырыла.
Тамашачылар әлеге премьераны бик җылы кабул итте. Алар яшь артистларны кайнар алкышлар һәм бүләкләр белән сөендерде. Чара азагында студия шәкертләре ата-аналар белән берлектә, «Во благо вместе» хәйрия фондына багышлап, яңа җыр башкарды.
