28 апрель көнне Россия халыкларының мәдәни мирас елы һәм #МЫВМЕСТЕ бер-береңә ярдәм итү атнасы кысаларында «АК БАРС ЯҢАРЫШ» Хәйрия фонды, Кәрим Тинчурин исемендәге Татар дәүләт драма һәм комедия театры белән берлектә, сәламәтлеге чикле балаларның «Театр – All Inclusive» V Республика театр студияләренең Гала – фестивален үткәрде.
Әлеге проект Татарстан Республикасында 2018 елдан башлап мөмкинлекләре чикләнгән балаларны реабилитацияләүдә, социальләштерүдә ярдәм итү һәм театр сәнгатенә җәлеп итү аша аларның иҗади сәләтләрен үстерү максатыннан тормышка ашырыла. Бу вакыт эчендә 800гә якын үзенчәлекле бала актерлык һәм сәхнә осталыгы буенча белем алды, 150дән артык театральләштерелгән тамаша күрсәтелде.
28 апрельдә зур сәхнәдә 11 театр студиясе жюри хөкеменә фестивальнең төп идеясенә – дөнья халыкларының берләшүенә, сабырлыкка һәм киң күңеллелеккә багышланган 12 спектакль тәкъдим итте.
Фестивальне «АК БАРС ЯҢАРЫШ» фонды директоры Әлфия Вәлиева ачып җибәрде. Ул үзенең чыгышында катнашучылар санының елдан-ел арта һәм конкурска җибәрелгән балалар спектакльләренең сыйфаты яхшыра баруын билгеләп үтте.
Быелгы фестивальнең үзенчәлеге – катнашучыларның яше артуында. Фестиваль финалында беренче тапкыр «Малыш» студиясеннән яшь актерлар катнашты. Аларга көч бирергә Республиканың иң ерак районнарыннан берсе – Әгерҗедән әти-әниләр дә килде. Беренче тапкыр гына катнашуларына карамастан, балалар үз бурычларын тиешенчә үтәделәр һәм лаеклы рәвештә 3 нче урынны яуладылар.
Жюри «Могҗиза» (Казан ш.) һәм «Салават күпере» (Ютазы, Урыссу бистәсе) театр студияләре тәкъдим иткән буыннар өзеклеге һәм яшүсмерләр арасында үзара мөнәсәбәтләргә кагылышлы актуаль социаль мәсьәләләр күтәргән ике авторлык спектаклен аерым билгеләп үтте.
Бүләкләү тантанасында Татарстан Иҗтимагый палатасы рәисе урынбасары Тимур Кадыйров, катнашучыларны котлап: «Әлеге проект сәләтле һәм театрга гашыйк балаларны бергә җыйды. Яшь актерлар күзләрендә тормыш чаткыларын күрү күңелле. Аларга актерлык өлкәсендә һәм тормыш юлында уңышлар телим! » – диде һәм К.Тинчурин исемендәге театр коллективына Республиканың инклюзив театрлары үсешенә өлеш кертүләре өчен Рәхмәт хаты тапшырды.
«Калейдоскоп» театр студиясенә (Казан ш.) Гран-прины Татарстан Республикасы Хезмәт, халыкны эш белән тәэмин итү һәм социаль яклау министры урынбасары Гадел Мөбәрәкшин тапшырды. Ул шулай ук үзенчәлекле балаларны социальләштерүгә ярдәм итүче Республика фестиваленең әһәмиятен билгеләп үтте һәм министрлыкның әлеге проектка мәгълүмати ярдәм күрсәтергә әзер булуын җиткерде.
Бүләкләү тантанасында шулай ук Татарстан Республикасы Яшьләр эшләре буенча министр урынбасары вазыйфаларын башкаручы Динар Хафизов, Татарстан Республикасы Мәгариф һәм фән министрлыгының гомуми белем бирү бүлеге башлыгы Татьяна Иванова, Татарстанның халык артисткасы Зөлфия Вәлиева, Казан дәүләт мәдәният институты доценты, Татарстанның атказанган сәнгать эшлеклесе Раушан Шәрипов, Татарстанның атказанган артисты Ирек Хафизов катнашты.
Барлык җиңүчеләр дә дипломнардан тыш, Республиканың социаль учреждениеләре каршындагы театр студияләрен алга таба үстерү өчен «АК БАРС ЯҢАРЫШ» фондыннан финанс ярдәме алачак.
Мөмкинлекләре чикләнгән балаларның «Театр – All Inclusive» V Республика театр студияләре Гала – фестивале җиңүчеләре:
Гран-при
— «Калейдоскоп» театр студиясе (Казан ш.), ДБМУ «Мөмкинлекләре чикләнгән ятим һәм ата-ана каравыннан мәхрүм калган балалар өчен 11 нче Казан мәктәп-интернаты», «Птица счастья» спектакле өчен;
1 урын
— «Могҗиза» театр студиясе (Казан ш.), ДБУ «К.Тинчурин исемендәге Татар дәүләт драма һәм комедия театры», «Миһербанлык» спектакле өчен;
— «Зеленая шуба» мәктәп инклюзив театры (Казан ш.), МБМУ «Фарватер» Казан шәһәре Идел Буе районының 78 нче номерлы лицее;
2 урын
— «Овация» театр студиясе (Арча районы), «Татарстан Республикасы Хезмәт, халыкны эш белән тәэмин итү һәм социаль яклау министрлыгының мөмкинлекләре чикләнгән балалар һәм яшүсмерләр өчен «Исток надежды» реабилитация үзәге», «Теремок» спектакле өчен;
— «Мозаика» театр студиясе (Яр Чаллы ш.), ДБМУ «Мөмкинлеге чикләнгән балалар өчен 88-нче номерлы Яр Чаллы мәктәбе», «Золотой петушок» спектакле өчен;
— «Театральный мир» театр студиясе (Минзәлә районы), ДБМУ «Мөмкинлекләре чикләнгән ятим һәм ата-ана каравыннан мәхрүм калган балалар өчен Минзәлә интернат-мәктәбе», «Волк-простофиля» спектакле өчен;
— «Салават күпере» театр студиясе (Ютазы, Урыссу бистәсе), ТР Ютазы муниципаль районының ДБМУ «Мөмкинлекләре чикләнгән балалар өчен Урыссу интернат-мәктәбе», «Онытылмас еллар тарихы» спектакле өчен;
3 урын
— «Веселая карусель» театр студиясе (Әлмәт районы), Мөмкинлеге чикләнгән ятим һәм ата-ана тәрбиясеннән мәхрүм калган балалар өчен ДБУ «Әлмәт балалар йорты», «Рифмы» спектакле өчен;
— «Калейдоскоп» театр студиясе (Казан ш.), ДКУ «Психик тайпылышлары булган гражданнар өчен Дәрвишләр бистәсе балалар интернат-йорты», «Красная шапочка на новый лад» спектакле өчен;
— «Малыш» театр студиясе (Әгерҗе районы), Әгерҗе шәһәренең 7нче «Малыш» балалар бакчасы, «Теремок» спектакле өчен (инглиз телендә);
— «Росинки» мәктәп инклюзив театры (Югары Ослан районы), ДБМУ «Яр буе Морквашы урта мәктәбе», «Вядёрочки» спектакле өчен.
К.Тинчурин театрының матбугат хезмәте
