Татарча Русский English

Чаялыгы белән дан казанган артист гомер бәйрәменә чакыра

23 ноябрьдә Кәрим Тинчурин исемендәге Татар дәүләт драма һәм комедия театрында Татарстанның атказанган артисты Әлфия Хәсәновага 60 яшь тулу уңаеннан бенефис оештырылачак. Юбилей уңаеннан сәхнәдә Шамил Фәрхетдиновның “Мәхәббәт баскычы” спектакле тәкъдим ителә.

Комедия жанрында язылган пьесаның авторлары — Россиянең атказанган артисты, Татарстанның атказанган сәнгать эшлеклесе Рәшит Заһидуллин һәм Татарстанның атказанган артисты Шамил Фәрхетдинов. Әсәрне сәхнәгә театрның баш режиссеры Рәшит Заһидуллин куйган.

Әлеге шаян әсәрдә Әлфия Хәсәнова Артурның әнисе Әлфия ханым образын башкара. Әлеге образда Әлфия ханымның табыгый чаялыгы сәхнәдә дә ачык күренә. Гомумән, Әлфия Хәсәнованы театр сөючеләр җор теллелеге, гади булуы өчен ярата. Тормышчан образлары аша ул һәркайсыбызны уйларга, фикер йөртергә чакыра алуга сәләтле. Сәхнәдәге җитез хәрәкәтләре, эченнән ургылып торган энергиясе сәхнәдән ташып чыгып, тамашачыларга да тарала. Артисткабыз, әйтерсең берничә дистә ел гомер яшәмәгән дә. Сәхнәнең сихри көче аны яшәтә дә, яшәртә дә, ди аның хакта коллегалары.

 

Татарстанның атказанган артисты Әлфия Хәсәнова Саба районының Чәбки авылында 1952 елда дөньяга килә. Театрда хезмәт юлын 1979 елдан башлап җибәрә.

Театрдагы 33 ел иҗат гомерендә берсеннән-берсе истә кала торган образлар тудырган кеше ул. Әлеге образлар һәрбер тамашачыга якын. Әлфия ханым кемнеңдер күршесе, кемнеңдер хезмәттәше, укытучысы, якын дусты. Тамашачы үзенең якын кешеләрен талантлы артисткабыз кыяфәтендә күрә. Әнә шул ачыклык, үтемлелек аларны әсир итә дә инде.

Әлфия Хәсәнованың театрда уйнаган төп рольләре: Мөслимә — Т.Миңнуллин “Кырларым- тугайларым”, Гера — В.Шекспир “Юктан чыккан гауга”, Сәлви — Н.Исәнбәт “Хуҗа Насретдин”, Газия — Э.Яһүдин “Мәхәббәткә мәдхия”, Аида — И. Грекова “Тол хатыннар көймәсе”, Разия — К.Тинчурин “Американ”, Әлфия — Ш.Фәрхетдинов, Р.Заһидуллин “Мәхәббәт баскычы” һ.б.

Театр 23 ноябрьдә Әлфия Хәсәнованың иҗатына тагын бер кат күз салырга чакырып кала.

«Интертат»