Театрыбыз музеенда бик матур, истәлекле очрашу узды. Кунакка Казанның медицина көллиятеннән бер төркем студент кызлар килде. Очрашуда хөрмәтле кунаклар – Татарстанның халык артисткасы Ләлә Миңнуллина һәм театрыбызның талантлы артисты Илнур Байназаров катнашты.
Ләлә Миңнуллина балачагын, яшьлек-студент елларын, ничек театрга эшкә килүен, беренче ролен, театрда узган озын иҗат юлын бәйнә-бәйнә сөйләде, спектакльдән монологлар укыды, өзекләр башкарды, сорауларга җавап бирде, киңәшләрен җиткерде. Үзенең кызы Айгөлнең дә табибә, студентларга белем бирүе турында сөйләп узды, аның белән чиксез горурлануын әйтте. Шулай ук артист һөнәре белән табибә һөнәре икесе дә охшаш, аларның халыкка хезмәт итүен, ике һөнәрнең дә сабырлык, кешелеклелек, җаваплылык соравын искәртеп узды.
Илнур Байназаров, гитарада уйнап, кызларга үзенең моңлы җырларын бүләк итте. Әлеге очрашуны музей җитәкчесе Розалия Чабатова оештырды хәм алып барды.
Тинчурин театры матбугат хезмәте
